Brigitte Blomlie

Brigitte Blomlie (f. 1992) frå Valdres er dansar, songar, skodespelar og adjunkt. Grunnlaget for rørslematerialet hennar hentar ho frå folkedansen, og ho kombinerer dette med eige materiale for å skape ei levande uttrykksform. Ho er oppteken av å skape sterke visuelle uttrykk og nyttar heile kjensleregisteret i formidlinga si. 

I dag er ho medskapande dansar i framsyningane Livmødre (2022) og The Dancers’ Brew med Mamelukk dansekompani. I tillegg er ho dansar, skodespelar og idéutviklar i eigne prosjekt i framsyningane Snøsong (2024) og Danse mi dokke (2023), og dessutan dansar og songar i showframsyninga HallingStreet. 

Tidlegare har Brigitte Blomlie hatt engasjement som dansar og skodespelar ved Västanå Teater. Medverknaden hennar i ei rekkje korkonsertar, musikalar, teaterframsyningar og showkonsertar viser at ho er svært allsidig. Som valdris er ho stolt forvaltar av halling og tradisjonsdans frå dalføret og har gått i lære hjå ei rekkje av Noregs fremste folkedansarar, på Frikarakademiet, og gjennom Lea de – Bygda Dansar. Utover engasjementet som scenekunstnar tek ho også på seg oppdrag som solist og held kurs i folkedans for folk alle aldrar.