Valdresstrykerne

Valdresstrykerne er eit barne- og ungdomsorkester som vart stifta i 2002. Dirigentar for orkesteret er Eivind Dølerud og Susanne Engelmann. Orkesteret øver på Fagernes kvar veke. Medlemmene kjem hovudsakleg frå Nord-Aurdal, Vestre Slidre og Øystre Slidre. Ein viktig del av profilen til orkesteret er å fremme samarbeid mellom folkemusikk og klassisk musikk. Ved fleire høve har orkesteret hatt Valdres Folkemusikkgruppe som solistar, med blant andre Trygve Bolstad og Magne Olav Selland på hardingfele, Ole og Knut Aastad Braaten på langeleik og Marit Karlberg med song. Også Jan Beitohaugen Granli, som har vunne Landskappleiken i hardingfele fire gonger, har ved eit par høve vore solist med Valdresstrykerne.

Valdresstrykerne har dessutan samarbeidd med andre musikalske utøvarar innanfor jazz eller med andre strykarar. Hadeland Strykeorkester og Arci Armonici frå Gjøvik er nære samarbeidspartnarar. Gjennom ei årrekke har vi samarbeidd med det spanske orkesteret Cemb, som har tilhald i Barcelona. Saman har vi delteke tre gonger på Mozartini-festivalane i Montecorvino Rovella på Amalfikysten i Italia. I 2011 og i 2013 deltok Valdresstrykerne på Cemb festival i Tarascon sur Ariege i dei franske Pyreneane.

Valdresstrykerne har fått æra av å ha Eldbjørg og Ragnhild Hemsing som solistar. Også unge musikarar frå forskjellige italienske konservatorium har vore solistar. I 2003 fekk orkesteret besøk av Bologna Chamber orchestra og heldt konsert saman med dei. Ein av spesialitetane til orkesteret er å framføre verk for kor og orkester. Mellom anna har dei framført Faures Requiem med Jevnaker Korforening, Reihnbergers «Stabat Mater» med Øystre Slidre sanglag, Buxtehudes kantate «Alles Was Ihr tut mit worten oder mit werken», «Gloria» av Vivaldi og «Nun komm, der Heiden Heiland», BWV 62, av J.S. Bach med Tingnes Kammerkor.

I 2002, 2004, 2005, 2007 og 2008 deltok Valdresstrykerne på Mozartini-festivalen i Montecorvino Rovella i Italia. Orkesteret har delteke på ei rekke konsertar rundt på Amalfikysten, blant anna på Ravello-festivalen. I 2006 fekk Nord-Aurdal kulturskole Postens kulturpris under Oslo Kammermusikkfestival.