Ragnhild Hemsing

Ragnhild Hemsing skil seg ut blant dei nye talenta i Noreg som ein uvanleg allsidig artist. Ho har djupe røter i den rike folkemusikktradisjonen i Noreg, og det gjer henne til ein av dei første artistane som på ein vellykka måte smeltar saman typiske trekk ved norsk folkemusikk og klassisk musikk på ein ungdommeleg, frisk og fullt ut moderne måte.

Hemsing har eit stort repertoar med klassiske soloverk for fiolin, og supplerer det med meir uvanlege og kompliserte verk skrivne for hardingfele. Innanfor samtidsmusikk kan nemnast samarbeidet med den norske komponisten Lasse Thoresen. I etterkant har Hemsing spelt inn dette verket på plate – den første soloplata hennar – på plateselskapet Simax. Denne cd-en og innspelinga hennar av Halvorsens «Fossegrimen» op. 21 for Chandos med Bergen Filharmoniske Orkester og Neeme Järvi fekk framifrå omtale frå kritikarane. Etterpå inviterte Järvi Ragnhild Hemsing til å spele med Estonian National Symphony Orchestra i februar 2012.

Då ho var berre 14, debuterte Hemsing med Bergen Filharmoniske Orkester, der ho framførte Mendelssohns fiolinkonsert. Same år spelte ho med Trondheim Symfoniorkester, og året etter vart ho invitert til å spele med Oslo-Filharmonien. Etter det har ho spelt med alle dei større norske orkestera og med orkester i USA, Tyskland, Sverige, Nederland, Belgia og Ukraina.

Ragnhild Hemsing har vore gjesteartist ved alle dei store festivalane og konserthusa i Noreg, mellom andre Festspillene i Bergen, Festspillene i Nord-Norge, kammermusikkfestivalane i Oslo, Stavanger og Trondheim, Nordlysfestivalen i Tromsø, Hardingtonar og Førde Internasjonale Folkemusikkfestival, der ho har kombinert folkemusikk med eit klassisk repertoar. Ho har òg opptredd på festivalar over heile Europa og i USA.

Ragnhild Hemsings nyaste plateinnspeling Vivaldi, the Norwegian Seasons frå 2024 er eit resultat av Hemsings samarbeid med Barokkanerne. Her bruker ho hardingfela som eit barokkinstrument og dreg inn lokal folkemusikk i si tolking av Vivaldis Dei fire årstidene.

Hemsing har motteke mange prisar, mellom anna First Prize og European Union Prize under Kocian International Violin Competition. I 2012 fekk ho den prestisjetunge Arve Tellefsens Musikerpris. Etter debuten ved Beethovenfest Bonn 2013 fekk ho den anerkjente prisen Beethoven-ring av foreininga «Borgarar for Beethoven».

Ragnhild Hemsing er ein velkjend artist på norsk radio og tv. Saman med systera Eldbjørg Hemsing spelte ho inn ein timelang dokumentar om livet til Ole Bull – eit program som fekk ein EBU-pris. 

Saman med systera Eldbjørg er Ragnhild kunstnarisk leiar av Hemsingfestivalen, ein kammermusikkfestival for intime møte med stor musikk i februar kvart år. Vinterfestivalen i Aurdal i Valdres vart etablert av systrene i 2013. 

Ragnhild Hemsing vart fødd i Valdres i 1988, i hjartet av Folkemusikk-Noreg. Ho begynte å spele fiolin då ho var fem, og studerte ved det prestisjetunge Barratt Due musikkinstitutt i Oslo og deretter med professor Boris Kuschnir i Wien. Ho spelar på ein fiolin som er bygd av Francesco Ruggeri (Cremona, 1694), og som er utlånt frå Dextra Musica.