Tor Espen Aspaas

Pianist og professor Tor Espen Aspaas er ein av dei leiande formidlarane i sin generasjon av norske musikarar. I 2016 vart han utnemnd til riddar av 1. klasse av Den Kongelege Norske St. Olavs orden for innsatsen sin for musikk- og kulturformidling.

I 1996 mottok Aspaas solistdiplomet sitt ved Noregs musikkhøgskole, og året etter debuterte han i Oslo, til strålande kritikkar. I 2006 vart han – 34 år gammal – professor ved Noregs musikkhøgskole, der han også var viserektor i fire år (2006–2009). Ved sida av undervisning og rettleiing forska han mellom anna på improvisasjonens rolle i Beethovens kreative prosessar og verk, med hovudvekt på dei 32 pianosonatane, som Aspaas framfører komplett. I januar 2023 slutta han ved Musikkhøgskolen for å arbeide som frilansar på fulltid. 

Aspaas er tildelt ei rekke prisar og utmerkingar – deriblant De Unges Lindemanpris, Levinprisen og Nils Larsens legat, og han har vore solist med fleire internasjonale symfoniorkester i tillegg til dei fremste norske, sidan han debuterte med Oslofilharmonien med Mozarts klaverkonsert nr. 24 i 2000 og med Ravels klaverkonsert i G-dur i 2002. Blant dirigentane Aspaas har samarbeidd med som solist, finst namn som Frans Brüggen, Vassilij Sinajskij, Michel Plasson, Stefan Karpe, Christian Eggen, Krzysztof Urbanski, Bjarte Engeset, Peter Szilvay og Rolf Gupta. 

Aspaas har urframført ei rekke samtidsverk, m.a. Olav A. Thommessens klaverkonsert nr. 3 med Trondheim symfoniorkester, dirigert av Arvid Engegård, i 2011, og Terje Bjørklunds klaverkonsert med same orkester under leiing av Daniel Blendulf i 2015. 

Ved sida av konsertar og verdsomspennande turnear er Aspaas jamleg engasjert ved norske og internasjonale festivalar og seriar. Hausten 2010 fekk han mykje omtale for ein serie framføringar av Debussys 24 preludium komplett, m.a. i Den Norske Opera. I mars 2013 fekk han sin USA-debut med ein solokonsert i Carnegie Hall, NY. 

Aspaas gir jamleg meisterklassar og er ein ettertrakta jurymedlem ved musikkonkurransar i inn- og utland. I snart tjue år har han systematisk arbeidd med formidlingsforma konsertforedrag (lecture recital) og har halde ei rekke slike foredrag på fleire språk. Aspaas har ein omfattande diskografi med 15 CD-utgivingar bak seg, blant desse internasjonalt kritikarroste solo-CD-ar med verk av Beethoven, Schönberg, Berg og Webern og dessutan den franske komponisten Paul Dukas’ samla klaververk. 

Han var ein av initiativtakarane bak Vinterfestspill i Bergstaden på Røros og var kunstnarisk leiar for festspela i åra 1999–2008 og 2014, og ved 20-årsjubileet i 2019.